Urdu News
نائب وزیراعظم اور وزیر خارجہ اسحاق ڈار نے منگل کے روز شنگھائی تعاون تنظیم (ایس سی او) کے رکن ممالک پر زور دیا ہے کہ وہ باہمی لین دین کے لیے قومی کرنسیوں کا استعمال کریں اور بین الاقوامی مالیاتی جھٹکوں سے نمٹنے کے لیے دیگر مالیاتی میکانزم قائم کریں۔ انہوں نے یہ ریمارکس تاجکستان کے دارالحکومت دوشنبہ میں شنگھائی تعاون تنظیم کی کونسل آف ہیڈز آف گورنمنٹ (سی ایچ جی) کے اجلاس سے خطاب کرتے ہوئے کیے، جہاں وہ ایک روز قبل پہنچے تھے۔
شنگھائی تعاون تنظیم 10 رکن ممالک پر مشتمل ہے جن میں پاکستان، چین، بھارت، ایران، روس، کرغزستان، بیلاروس، قازقستان، تاجکستان اور ازبکستان شامل ہیں۔ افغانستان اور منگولیا دو مبصر ریاستیں ہیں۔ سی ایچ جی شنگھائی تعاون تنظیم کا دوسرا سب سے بڑا فیصلہ ساز ادارہ ہے جو اقتصادی، مالیاتی، تجارتی، رابطوں اور سماجی و اقتصادی تعاون کے ساتھ ساتھ تنظیم کے بجٹ کے معاملات پر رہنمائی فراہم کرتا ہے۔ اسحاق ڈار نے اجلاس سے خطاب کرتے ہوئے “باہمی لین دین کے لیے قومی کرنسیوں کے استعمال کو فروغ دینے کی کوششوں کو تیز کرنے” کی ضرورت پر روشنی ڈالی۔ انہوں نے شنگھائی تعاون تنظیم ڈویلپمنٹ بینک، شنگھائی تعاون تنظیم ڈویلپمنٹ فنڈ اور شنگھائی تعاون تنظیم انویسٹمنٹ فنڈ کے قیام کی بھی تجویز پیش کی۔
سابق وزیر خزانہ نے مزید کہا کہ “ایسے اوزار ترقیاتی اقدامات کو آگے بڑھائیں گے اور شنگھائی تعاون تنظیم کے خطے کو بین الاقوامی مالیاتی جھٹکوں سے نمٹنے میں مدد دیں گے۔” اسحاق ڈار نے اجلاس کے ایک وسیع تر سیشن سے خطاب میں مقامی کرنسیوں میں لین دین کو تیز کرنے کے اپنے مطالبے کو دہرایا۔ یہ بات قابل ذکر ہے کہ شنگھائی تعاون تنظیم کے دو رکن ممالک، روس اور ایران، مغربی پابندیوں کا سامنا کر رہے ہیں، جس سے قومی کرنسیوں کے استعمال کی تجویز ان کے لیے خاص اہمیت رکھتی ہے۔
