گوادر بندرگاہ پر پہلی کامیاب تجارتی بنکرنگ سروس کا آغاز

گوادر: گوادر بندرگاہ نے اپنی سمندری کارروائیوں کو وسعت دینے کی کوششوں کے تحت اپنی پہلی کامیاب تجارتی بنکرنگ (جہازوں کو ایندھن فراہم کرنے) سروس مکمل کر لی ہے۔ یہ آپریشن 9 سے 11 جولائی کے درمیان گوادر پورٹ اتھارٹی (GPA)، نیشنل لاجسٹکس سیل (NLC)، گوادر انٹرنیشنل ٹرمینلز لمیٹڈ (GITL) اور عالمی توانائی کمپنی وٹول ایشیا کے باہمی تعاون سے انجام پایا۔

اس آپریشن کے دوران، دنیا کی معروف کمپنیوں قطر انرجی، ابوظہبی نیشنل آئل کمپنی اور وٹول کی مشترکہ ملکیت والے ایل این جی کیریئر ‘اینگو’ کو گوادر بندرگاہ پر 2,500 میٹرک ٹن انتہائی کم سلفر والا فیول آئل (VLSFO) فراہم کیا گیا۔ 285.4 میٹر طویل اس جہاز کو ایندھن کی فراہمی بنکر بارج ‘میرین اِستا’ کے ذریعے کی گئی۔ پاکستان کسٹمز، بندرگاہ حکام اور مقامی شپنگ ایجنٹ پاک ٹریڈرز گوادر نے اس آپریشن کی محفوظ اور موثر تکمیل کو یقینی بنانے میں اہم کردار ادا کیا۔

اس آپریشن سے گوادر بندرگاہ پر دستیاب خدمات کی حد میں اضافہ ہوا ہے، جو اب کارگو ہینڈلنگ کے علاوہ بین الاقوامی جہازوں کو بنکرنگ اور دیگر سمندری خدمات بھی فراہم کر سکے گی۔ ماہرین کے مطابق، یہ پیش رفت غیر ملکی زرمبادلہ کمانے اور ریونیو پیدا کرنے کے نئے مواقع پیدا کرے گی۔ انہوں نے مزید کہا کہ یہ گوادر بندرگاہ کی بین الاقوامی شپنگ خدمات کو اپنی طرف متوجہ کرنے کی صلاحیت کو بھی بڑھائے گا۔ یہ کامیابی چائنا پاکستان اقتصادی راہداری (CPEC) کے وژن کے عین مطابق ہے جس کا مقصد گوادر کو ایک اہم علاقائی تجارتی اور توانائی مرکز میں تبدیل کرنا ہے۔