Urdu Newsاسلام آباد: دبئی سے اسلام آباد جانے والی پی آئی اے کی پرواز پی کے 212 میں معمول کی تاخیر نے اس وقت افراتفری کی صورت اختیار کر لی جب مسافروں نے کاک پٹ میں داخل ہونے کی کوشش کی اور طیارے کو نقصان پہنچایا۔ ساڑھے تین گھنٹے کی تاخیر پر مسافروں کا صبر جواب دے گیا اور صورتحال قابو سے باہر ہو گئی۔
ذرائع کے مطابق، پرواز پی کے 212 میں سوار مسافروں کے ایک گروپ نے مبینہ طور پر طیارے کے کاک پٹ میں زبردستی داخل ہونے کی کوشش کی اور اس دوران طیارے کو بھی نقصان پہنچایا۔ اس غیر معمولی صورتحال کے پیش نظر دبئی ایئرپورٹ پر سیکیورٹی اہلکاروں کو طلب کر لیا گیا جنہوں نے فوری کارروائی کرتے ہوئے متعدد مسافروں کو گرفتار کر لیا۔
اس واقعے کے نتیجے میں پی آئی اے کے طیارے کو دبئی ایئرپورٹ پر گراؤنڈ کر دیا گیا ہے اور مزید تحقیقات جاری ہیں۔ گرفتار شدگان میں پاکستانی شہری شامل ہیں۔ اس صورتحال کے باعث دیگر مسافروں کو بھی شدید مشکلات کا سامنا کرنا پڑا اور انہیں متبادل انتظامات کا انتظار کرنا پڑا۔
