Urdu Newsاسلام آباد: صدر مملکت آصف علی زرداری اور وزیراعظم شہباز شریف نے عید میلاد النبی ﷺ کے پرمسرت موقع پر پاکستان سمیت دنیا بھر کے مسلمانوں کو مبارکباد پیش کی ہے۔ اپنے پیغامات میں دونوں رہنماؤں نے امت مسلمہ پر زور دیا ہے کہ وہ نبی اکرم حضرت محمد ﷺ کی حیاتِ طیبہ اور تعلیمات سے رہنمائی حاصل کریں اور انہیں اپنی زندگیوں کا حصہ بنائیں۔
صدر آصف علی زرداری نے اپنے پیغام میں حضور اکرم ﷺ کی ولادت باسعادت کو انسانیت کے لیے ایک عظیم نعمت قرار دیا۔ انہوں نے فرمایا کہ نبی کریم ﷺ کی آمد نے دنیا کو جہالت کے اندھیروں سے نکال کر علم، امن اور بھائی چارے کی روشنی سے منور کیا۔ صدر مملکت نے اس بات پر زور دیا کہ ہمیں سیرتِ نبوی ﷺ کے سنہری اصولوں، صبر، برداشت، انصاف اور مساوات کو اپنا کر ایک مثالی معاشرہ تشکیل دینا چاہیے جو نبی اکرم ﷺ کی تعلیمات کا عملی نمونہ ہو۔
وزیراعظم شہباز شریف نے اپنے پیغام میں کہا کہ عید میلاد النبی ﷺ کا دن ہمیں اس بات کی یاد دلاتا ہے کہ ہم نبی اکرم ﷺ کی تعلیمات پر عمل پیرا ہو کر دنیا و آخرت کی فلاح حاصل کر سکتے ہیں۔ انہوں نے مزید کہا کہ نبی کریم ﷺ نے ہمیں اتحاد، اخوت اور انسانیت کی خدمت کا درس دیا۔ وزیراعظم نے پاکستانی قوم سے اپیل کی کہ وہ نبی اکرم ﷺ کے اسوہ حسنہ پر عمل کرتے ہوئے ملک میں امن، استحکام اور خوشحالی کے لیے اپنا کردار ادا کریں اور باہمی اختلافات کو بھلا کر ایک مضبوط قوم بنیں۔
