Urdu News
صدر مملکت آصف علی زرداری نے اسلام آباد کے پمز اسپتال میں پیش آنے والے دلخراش واقعے میں معصوم بچوں کی ہلاکتوں پر گہرے رنج و غم کا اظہار کیا ہے۔ انہوں نے سوگوار خاندانوں سے دلی تعزیت کی اور لواحقین کے لیے صبر جمیل کی دعا کی۔
صدر زرداری نے واقعے کی فوری اور شفاف تحقیقات کا حکم دیتے ہوئے کہا کہ اس دلدوز سانحے کے ذمہ داروں کا تعین کیا جائے اور انہیں قانون کے کٹہرے میں لایا جائے۔ انہوں نے زور دیا کہ مستقبل میں ایسے واقعات کی روک تھام کے لیے تمام ضروری اقدامات کیے جائیں تاکہ قیمتی انسانی جانوں کا ضیاع روکا جا سکے۔
صدر مملکت نے متعلقہ حکام کو ہدایت کی کہ وہ ملک بھر کے اسپتالوں میں حفاظتی انتظامات کا جائزہ لیں اور مریضوں بالخصوص بچوں کے لیے محفوظ اور معیاری طبی سہولیات کی فراہمی کو یقینی بنائیں۔ انہوں نے کہا کہ انسانی جانوں کا تحفظ حکومت کی اولین ترجیح ہے اور اس سلسلے میں کوئی کوتاہی برداشت نہیں کی جائے گی۔
