Urdu News
واشنگٹن: امریکی خلائی ایجنسی ناسا نے تصدیق کی ہے کہ ہفتہ کے روز شمال مشرقی امریکا کی فضا میں زمین کی طرف بڑھتا ہوا ایک شہاب ثاقب پھٹ گیا، جس سے زوردار دھماکے ہوئے جن کی گونج پورے علاقے میں سنائی دی۔ ناسا کے مطابق، اس دھماکے کی شدت 300 ٹن ٹی این ٹی کے برابر تھی۔
امریکی خلائی ایجنسی کی ڈپٹی نیوز چیف جینیفر ڈورین نے خبر رساں ایجنسی اے ایف پی کو ایک بیان میں بتایا کہ یہ فائر بال شمال مشرقی میساچوسٹس اور جنوب مشرقی نیو ہیمپشائر کے اوپر مقامی وقت کے مطابق دوپہر 2 بج کر 6 منٹ پر (پاکستان کے وقت کے مطابق رات 11 بج کر 6 منٹ پر) ٹوٹا۔ جینیفر ڈورین نے وضاحت کی کہ “یہ فائر بال کسی بھی موجودہ فعال شہاب ثاقب کی بارش سے منسلک نہیں تھا، بلکہ یہ ایک قدرتی چیز تھی اور خلائی ملبے یا کسی سیٹلائٹ کا دوبارہ داخلہ نہیں تھا۔” انہوں نے مزید بتایا کہ “اس کے ٹوٹنے سے خارج ہونے والی توانائی کا تخمینہ تقریباً 300 ٹن ٹی این ٹی کے برابر ہے، جو زوردار دھماکوں کی وجہ بنا۔”
ڈورین نے بتایا کہ شہاب ثاقب 75,000 میل فی گھنٹہ (تقریباً 120,000 کلومیٹر فی گھنٹہ) کی رفتار سے 40 میل (تقریباً 64 کلومیٹر) کی بلندی پر سفر کر رہا تھا جب یہ ٹکڑوں میں بٹ گیا۔ علاقے کے رہائشی ان غیر متوقع اور زوردار دھماکوں سے خوفزدہ ہو گئے، جبکہ سوشل میڈیا صارفین نے رپورٹ کیا کہ دھماکے اتنے طاقتور تھے کہ ان کے گھروں میں لرزش محسوس کی گئی۔ واضح رہے کہ 2013 میں روس کے شہر چیلیابنسک کے اوپر بھی ایک ایسا ہی فائر بال گزرا تھا۔ ناسا کے مطابق، گھر کے سائز کی یہ خلائی چٹان زمین سے 14 میل (تقریباً 22 کلومیٹر) کی بلندی پر پھٹ گئی تھی، جس سے 440,000 ٹن ٹی این ٹی کے برابر دھماکہ ہوا تھا۔ اس دھماکے کے نتیجے میں 200 مربع میل (518 مربع کلومیٹر) سے زیادہ کے علاقے میں کھڑکیاں ٹوٹ گئی تھیں، اور 1,600 سے زائد افراد زخمی ہوئے تھے، جن میں سے زیادہ تر کو ٹوٹے ہوئے شیشے سے چوٹیں آئی تھیں۔
