برطانوی ہائی کمشنر کی پاکستانی طلبہ کے ویزوں میں تاخیر کا معاملہ حل کرنے کی یقین دہانی

اسلام آباد: پاکستان میں تعینات برطانوی ہائی کمشنر جین میریٹ نے پاکستانی طلباء کو درپیش ویزوں میں تاخیر کے مسئلے کو حل کرنے کی یقین دہانی کروائی ہے۔ یہ یقین دہانی انہوں نے وفاقی وزیر قانون و انصاف اعظم نذیر تارڑ سے ملاقات کے دوران کروائی، جہاں دونوں رہنماؤں نے دوطرفہ تعلقات اور باہمی دلچسپی کے امور پر تبادلہ خیال کیا۔

ملاقات کے دوران وفاقی وزیر قانون نے برطانوی ہائی کمشنر کو پاکستانی طلباء کو برطانیہ کے ویزے حاصل کرنے میں درپیش مشکلات سے آگاہ کیا۔ انہوں نے زور دیا کہ تعلیمی سال کے آغاز کے پیش نظر ویزوں میں تاخیر سے طلباء کا قیمتی وقت ضائع ہو رہا ہے اور ان کے تعلیمی مستقبل پر منفی اثرات مرتب ہو رہے ہیں۔ وزیر قانون نے اس معاملے کو فوری حل کرنے کی ضرورت پر زور دیا تاکہ پاکستانی طلباء بروقت اپنی تعلیم کا آغاز کر سکیں۔

برطانوی ہائی کمشنر نے وفاقی وزیر قانون کے اٹھائے گئے خدشات کو تسلیم کیا اور یقین دلایا کہ برطانوی حکومت پاکستانی طلباء کے ویزہ درخواستوں پر کارروائی کو تیز کرنے کے لیے تمام ممکن اقدامات کرے گی۔ انہوں نے کہا کہ برطانیہ پاکستانی طلباء کو اعلیٰ تعلیم کے مواقع فراہم کرنے کا خواہاں ہے اور اس سلسلے میں ویزہ کے عمل کو مزید موثر بنانے کے لیے اقدامات کیے جائیں گے۔ ہائی کمشنر نے مزید کہا کہ وہ اس معاملے کو متعلقہ حکام کے ساتھ اٹھائیں گی تاکہ جلد از جلد حل کو یقینی بنایا جا سکے۔