Urdu Newsلاہور: صوبائی ڈیزاسٹر مینجمنٹ اتھارٹی (پی ڈی ایم اے) پنجاب نے مون سون بارشوں کے چھٹے سلسلے کے لیے الرٹ جاری کر دیا ہے۔ پی ڈی ایم اے نے صوبے کے بیشتر اضلاع میں 16 اگست کی رات سے 21 اگست تک بارشوں کی پیش گوئی کی ہے۔
پی ڈی ایم اے کے ترجمان کے مطابق، راولپنڈی، مری، گلیات، جہلم، چکوال، تلہ گنگ، اٹک، سیالکوٹ اور نارووال سمیت کئی علاقوں میں بارش کا امکان ہے۔ یہ بارشیں درمیانی سے شدید نوعیت کی ہو سکتی ہیں، جس کے پیش نظر متعلقہ اداروں کو الرٹ رہنے اور کسی بھی ہنگامی صورتحال سے نمٹنے کے لیے تیار رہنے کی ہدایات جاری کی گئی ہیں۔
ان بارشوں کے باعث نشیبی علاقوں میں پانی جمع ہونے اور شہری سیلاب کا خطرہ بڑھ سکتا ہے۔ پی ڈی ایم اے نے شہریوں کو ہدایت کی ہے کہ وہ غیر ضروری سفر سے گریز کریں اور کسی بھی ہنگامی صورتحال میں مقامی انتظامیہ سے رابطہ کریں۔ کسانوں کو بھی اپنی فصلوں کے حوالے سے احتیاطی تدابیر اختیار کرنے کا مشورہ دیا گیا ہے۔
