چین میں طوفان باوی کی شدت میں کمی، لاکھوں افراد کا انخلا

اتوار کو مشرقی چین میں ساحل سے ٹکرانے کے بعد طوفان باوی کی شدت میں کمی آ گئی اور یہ ایک شدید سمندری طوفان میں تبدیل ہو گیا۔ حکام نے اس کے راستے سے تقریباً 20 لاکھ افراد کو پہلے ہی محفوظ مقامات پر منتقل کر دیا تھا۔ فوری طور پر کسی جانی نقصان کی اطلاع نہیں ملی۔

چین پہنچنے سے قبل، اس طوفان نے شمالی تائیوان اور جاپان کے دور دراز جنوب مغربی جزائر کو بھی اپنی لپیٹ میں لیا، جہاں درخت اکھڑ گئے اور ہزاروں افراد بجلی سے محروم ہو گئے۔ گزشتہ ہفتے بھی جنوبی اور وسطی چین میں شدید موسم نے تباہی مچائی تھی، جہاں طوفانوں کے نتیجے میں کم از کم 39 افراد ہلاک ہوئے اور درجنوں دریاؤں میں طغیانی آ گئی جبکہ ایک آبی ذخیرہ بھی پھٹ گیا۔

سرکاری خبر رساں ایجنسی ژنہوا نے صوبائی محکمہ موسمیات کے حوالے سے بتایا کہ طوفان باوی ہفتے کی رات تقریباً 11:20 بجے (پاکستانی وقت کے مطابق 8:20 بجے) صوبہ ژیجیانگ میں 144 کلومیٹر فی گھنٹہ کی رفتار سے چلنے والی ہواؤں کے ساتھ ساحل سے ٹکرایا۔ قومی ٹی وی چینل سی سی ٹی وی نے رپورٹ کیا کہ جب باوی یوہوان شہر سے ٹکرایا تو “مرکزی متاثرہ علاقے میں شدید ہوائیں اور موسلادھار بارش ہوئی، جس سے زمین پر تیزی سے پانی بہنے لگا اور سڑک کے کنارے کے درخت جڑ سے اکھڑ گئے۔”

اس کے بعد طوفان یویکنگ شہر سے ٹکرایا، جہاں سی سی ٹی وی کے مطابق فائر فائٹرز، امدادی کارکنان اور بلدیاتی ملازمین 1,300 سے زائد گرے ہوئے یا اکھڑے ہوئے درختوں کو ہٹا رہے تھے۔ چائنا ویدر ایڈمنسٹریشن نے بتایا کہ اتوار کی صبح تقریباً 10 بجے (پاکستانی وقت کے مطابق 7 بجے) طوفان کی آنکھ صوبہ ژیجیانگ کے دارالحکومت ہانگژو کے قریب پہنچ گئی تھی، جہاں ہواؤں کی رفتار تقریباً 108 کلومیٹر فی گھنٹہ تھی۔ ژنہوا نے مزید بتایا کہ ژیجیانگ کے صوبائی حکام نے ساحلی علاقوں میں شدید بارش اور سیلاب کے امکان کی پیش گوئی کی ہے، اور نقل و حمل میں خلل کی وارننگ بھی جاری کی ہے۔