Urdu News
بلوچستان کے مختلف علاقوں کوہلو، بارکھان اور رکھنی میں ایک بار پھر زلزلے کے شدید جھٹکے محسوس کیے گئے ہیں، جس سے عوام میں خوف و ہراس پھیل گیا۔ یہ جھٹکے صبح سویرے محسوس کیے گئے، جب زیادہ تر لوگ گہری نیند سو رہے تھے۔
زلزلہ پیماء مرکز کے مطابق، ریکٹر اسکیل پر زلزلے کی شدت 5.1 ریکارڈ کی گئی۔ زلزلے کا مرکز کوہلو سے تقریباً 30 کلومیٹر شمال مشرق میں زیر زمین 10 کلومیٹر گہرائی میں تھا۔ ان جھٹکوں کی وجہ سے کئی علاقوں میں عمارتیں لرز اٹھیں اور لوگ خوفزدہ ہو کر اپنے گھروں سے باہر نکل آئے۔
ابتدائی اطلاعات کے مطابق، کسی قسم کے جانی یا مالی نقصان کی کوئی اطلاع موصول نہیں ہوئی ہے۔ تاہم، مقامی انتظامیہ نے صورتحال کا جائزہ لینے کے لیے ٹیمیں روانہ کر دی ہیں۔ یاد رہے کہ بلوچستان کا یہ علاقہ زلزلے کی فالٹ لائن پر واقع ہے اور ماضی میں بھی یہاں کئی بار زلزلے کے جھٹکے محسوس کیے جا چکے ہیں، جس کے باعث یہاں کے رہائشیوں میں زلزلے کا خوف ہمیشہ موجود رہتا ہے۔
